منو راح ينتخب المواطن العراقي ؟ اكيد نانسي عجرم !
خلي نشوف المواطن العراقي من يفكر يريد ينتخب شراح يسوي ؟
من يطلع بطريقة الى المركز الانتخابي وهوة دايخ ميعرف شيختار, يشوف صور مال مرشحين اكثر من شعر راسة , راح يبدي يفكر ويكول اني المن اختار؟ منو الاجدر انطي صوتي ؟
راح يشوف هذا المواطن صورة جبيرة ومكتوب عليهة (معاً لجعل العراق خالي من الفساد ) بعدين يبدي المواطن يفكر ؟ زين هذا المرشح مو متهم بكم قضية فساد ؟؟
يكول يلة هية خربانة خربانة ,
يلتفت يلكي اكبر صورة معلكة بالشارع مال واحد من اعضاء البرلمان الحاليين ,يكول المواطن وية نفسة اهوووو هية كل يوم جمعة !
بعدين يدير وجهة يلكي واحد كاتب مليون شعار عن الدين ومنزل نص القرأن على اللافتة مالتة, يكول المواطن ايباخ هنا الدين والديانة ويفرح وهوة ديحجي وية روحة يطبون ثنين ديحجون (باع هذا قبل فترة كمشوا بقضية تزوير وهم عندة عين يرشح)
يصفن المواطن ويسكت
هناك يشوف صورة بيهة واحد ابتسامتة عضيمة والعضيم الله ومكتوب عليهة المهندس فلان ابن فلان !
المواطن يتغير لونة ويخترع ويكول هذا مو المدير مالتي ؟ زين الي اني اعرفة هوة مو مهندس ! هوة كوة مخلص متوسطة وعندة واسطة وصاير مدير براسي ويشمر عليه ! يكول اني كلت هية خربانة ,
يضوج المواطن ويصير عندة صداع ويدوخ وهناك يشوف اعلان مال شامبو بي صورة مال نانسي عجرم مكتوب جواهة الرقم مال المنتج . يفرح المواطن ويكول فرجت هنا الحجي ويروح وينتخب الشامبو بدل المرشحين
ويطلع فرحان وراسة بارد .
لو نجي ناخذهة الرشحين هواي والحملة الانتخابية انصرف عليهة هواي فلوس والعراقيين ميتين جوع والوضع الامني في تدهور والحمد لله ومنكول غير الله كريم
لو واحد من ذولة المرشحين صرف ربع فلوس الحملة ا لانتخابية مالتة على العوائل الفقيرة مو جان احسن اله واحسن للفئة العراقية الفقيرة؟
منكدر نكول نريد حكومة نزيهة مية بالمية ميخالف خلي يبوكون بس ولو ينطون شوية حق للشعب
شنكول كلمن اعرف بناسة ,وانشاء الله انتخابات منصفة وحكومة تحب شعبهة كبل جبيهة.
ايسر شهاب .
Date: February 20, 2010