متعودين من احد يحجي بشي والدنيا بمكان ثاني نكله: عرب وين وطنبورة وين. لمن يكون العالم واصل للقمر واحنا بعدنا نحاول نشغل المولدة التايكر. ولو التايكر صايرة احوال هسه وبعد منحطلها دهن وبانزين خبط. تذكرني بالفوكسواكن من بدت تطك واندار المحرك من ورا وصار لكدام
اتمنى فد يوم اشوف العراق همينه تندار احواله مثل الفوكسواكن ويطلع البوري من (خلفيته الحضارية) ويصير بيده وهو يضرب بواري بمكان مياكلها من ورا.
لحد هسه ماكليها احد وثلاثاء واربعاء. ده احس عبالك دنفتر بدائرة.. كبل ست سنين من سقط النظام والدولة والعراق كله قشمرونا وكالوا بس النظام سقط والوطن باقي رافع راسه (ولو بنظري المحدود انو رافع راسه وجسمه طامس بالوحل) بلعناها وكلنه مو مشكلة. قابل احسن من الالمان لو اليابانيين احنه؟ اشو همه همينه اكلو احتلال وهسه صار براسهم خير. ومجان لازم نكول انو الوطن محتل او بغداد ساقطة لان هذا الكلام مو دبلوماسي (واحنا من ساسنا لراسنا نحجه دبلوماسية… مو؟) لان احنا تحولنا من حالة عاوية الى حالة احسن. وميصير احد يقارن ويكول وضع كبل احسن. ومن احد يتبطر عالنظام الحالي تجيه حجاية بالكصة: يعني بوكت صدام احسن؟ من يجوك التكارته وينامون براسك لوتدفع رشوة حتى تمشي معاملتك؟ الرشوة والحمدلله ماشية لحد الان. لان لولا الرشوة مجان هالشعب بعده عايش ويه نظام فاسد ماليا واداريا بأعتراف من عرابته امريكا.
صح التكارتة راحو بس شنو الفرق؟ اشو بدلنه الخاكي وشوارب ثمانية شباط ورفيقي بعمامة وسيت محابس ومولاي. كبل جانت المرأة من القوى العاملة ونصف المجتمع وهسه صارت تحتاج محرم وناقصة عقل ودين. كبل جان اكو بطاقة تموينية وحصة توكل المواطن. هسه ظل المواطن والبطاقة بس الحصة طارت.
تره الشعب هو هو. والوضع اتعس. والعيشه اخرا (عذرا للكلمة بس ملكيت وصف ادق). بس الي فرق انو النظام تغير
علساس تغيير النظام راح يحسن الوضع. مع العلم انو النظام الحالي بدأ يمشي على خطى النظام السابق (باعوجها وليس عدلها) شوية شوية شاء ام ابى . بداها اول شي باحتلال الوظائف على اساس انو (ألي القربى) همه الاولى من غيرهم بالمناصب (من فهمهم الزايد). وبعدين بالبوزات والهوسات والتكميز والتهويس وحجي الفارغ. كبل جانوا يتقشمرون على صدام شلون يخلي راسه براس عمو سام ويتناطح ويه امريكا. هسه محد يحجي شلون يطلع رئيس الوزراء والقائد العام للقوات المصلخة (بالخاء وليس الحاء) يهدد الارهاببين بالحجي والعياط وبعدين ميكدر يسوي شي… بالعراقي الرجال طلع بوخه
لحد هسه قبطنا 3 ايام من الاسبوع وبقالنا اربعه. مادري شوكت راح يشيلون التلفون عالوزراء والرئيس ورئيس الوزراء اويجروهم من ياخة البجاما البازه حتى يحاسبوهم. يعني لازم ينثرم 25 مليون عراقي يلا هيجي يسوون؟ لو بس عرفوا يخربون البلد ويكعدون على تله؟ جنا من نشوف واحد عراقي يزامط ويحجي ويكول اني واني وبعدين يطلع مو كدها نلكه جماعته او الي ميستحون منه يكلوله: روح طم روحك احسن. زين الي ماعنده احساس حتى يطم روحه ميدري انو الناس ممكن تطمه بالحياة؟ لو مشايف العراقيين شلون جانوا يجرجرون السياسيين بالشوارع كبل ويسحلوهم؟ ماتصور العراقيين اقل انتقاما من كبل ولا الوضع الي كان غير مستقر كبل خمسين او ستين سنة اتعس من هسه. فوك كل هذا والحجي الرسمي مال الحكومة والتصريخات (وليست التصريحات) كلها تخوط يم الاستكان. ولمن لم يفهم هاي فمعناها: العالم بوادي والمسؤولين بغير وادي. تره مظلت التعلاكة مال كبل تفيد بعد. يعني مو مال نذبها براس البعثيين. ولا الارهاب. ولا اي احد من برا. لان هسه كل الي بيده مسؤولية جوا. واذا اكو واحد ديخرب فهو اكيد من جوا. لان اذا اجانه من برا فصوج الي دخله ليمنا
اشو بوكت صدام جان محد يستجري يطب للحدود او يتحارش بينا؟ الاكراد نفسهم (الي علساس مستقلين من ال95) جانو مخرين بشراويلهم من صدام وحزبه. جانو من يحلمون بكركوك او الاستقلال يفزون من نومتهم لايجيهم ابو عداي. هسه صاروا يتمضيكون وميعجبهم العجب بأسم تقرير المصير ويعنفصون عالانتخابات الا امريكا تنطيهم تطمينات يلا يشاركون ببرنامج هيلاهوب المسمى اللعبة السياسية (مع الاعتذار من المحترم وليد حبوش وبرنامجه الي على راسي من فوك لكن للضرورة احكام). ايران نفسها مجانت تتحارش بينا ولاتفكر تعلق عالسياسة الخارجية مال العراق. كل الي جانت مسويته تلفي شكم عفطي مسمين روحهم معارضة. وهسه صاير من ميعجبها شي تخلي السفير الايراني يجتمع بالحكومة ومجلس اللوردات المعمم. كبل جان الجعفري من يريد يقرر شي يركض للسيد وياه فيلق من الصحفيين يصورره شلون ياخذ بركته. تالي متالي طلعت حكومة ثيوقراط وطيحت حظنه. هسه صار السيد بعد ميوكل خبز لان احترك فلمه ومحد يكلبه. كبل يومين طلع العينتين الهاشمي وبطل قانون الانتخابات وخرب اللعبة لان جنابه خايف على اصوات البرا. ومسامع صوت العياط الجوا!! زين اشو ممد راسه من صارت الانفجارات وشاف شكو ماكو؟ بس عرفوا يروحون ركض لامريكا عبالك زعاطيط من تعاركوا عالكراسي بيناتهم. ميروحون هسه لامريكا حتى تجي تحل هالوضع الخربان! مو هي جابتهم ومديدبرون شي؟ خلي تبدلهم… لو هاي واكفه شوية؟ رحت زايد بيها يمكن مو بالله؟
وتريدون محد يقارن؟ هالاحداث كلها تفرنا وترجعلنا لنفس النقطة مال كبل ست سنين والسؤال الانفلاقي الذي يطرح نفسه ارضا ويتمرغل بالكاع: صدام والبعثية لو شلة العفطية؟!!. يمكن اجا الوكت الي بدوا العراقيين يسمون وكت صدام بوكت الخير! الي يحبوه والي يكرهو بدو يترحمون عليه. والسبب بسيط: اقل وابسط مستلزمات الحياة ممتوفرة
لان كل الي صار دينطي معنى واحد: انو النظام السابق احسن من الحالي. واذا واحد راح يكول كبل الناس مجانت عايشة ولاتكدر تسافر او تستمتع او اي شي من هالخريط فهمه اكيد غلطانين او ديغالطون نفسهم. لان كبل جان ال25 مليون واحد عايش ومدبر اموره. يجوز الوضع كبل تعبان بس هسه صاير كلش ومينجرع. يجوز كبل الناس تنكتل اذا راحت جيش شعبي او حرب او حجت نكتة عالريس. هسه ويه هالشغلات وبلاياها ديموتون… وفوك هذا كله مدتعرف تعيش مثل كبل
بس بقى ننتظر اخير كذبة جديدة تطلع بيها الحكومة الرشيدة وتقشمر العالم بيها وتلزم الخاشوكة وتخوط يم الاستكان
كل هذا ويكلولك المفسدون ليس لهم بالعراق قاعدة
علاء انيس
احسنت احسنت احسنت كلامك جدا جميل يشفي القلب من صدك بسسسسسسسسس تعرف كل الي بي العراق حاليا ارجع واكول كل الي نزرع بلماضي نحصد اليوم الماضي سببه الزيتوني سببه لان 35 سنه العراق مثل بركة ماء ابد متحركت شنو تريد ينمو بيه شنو تريد يطور بيه غير الطحالب وطفيليات وغيرها بضبط العراق جان هيج اول جرفت مي اجتي عليه طلعت كل الي بي يعني بهذاك الوكت مجان اكو حرية العتبير عن الراي لا تعدد احزاب الثقافه جدا محدوده غير ثقافة البعث مجنه نقره غير الثقافه القوميه مجان اكو كتب ومجان اكو توعيه بلمدارس شنو تريد يطلع المواطن العراقي تريده يكون مواطن كندي لو اوربي لاحظ الشباب العراقيين ميعرفون غير ثقافة السلاح طبعا من كثر الحروب ولبرنو الي جان يفتخر بيه ابو عداي يعني من راح صدام مترك البديل لان مجان اكو ضروف تسمح بتوليد بدائل لهذا عزيزي العراق من سيئ الى اسوء ونحتاج مو 6 سنوات حتى نتغير نحتاج على الاقل جيلين حتى العراق يصير براسه خير
مسوينا شي على هالحجي. شالو صدام وماكو واحد ياخذ مكانه ويسوي نص السواه. وين الزين بهالشغلة؟