على نيتي
تعددت الاعياد في امريكا والاكل واحد… المهم ذبح حلال حتى لانقع في اشكالات دينية
حضرت كبل شكم يوم عزيمة بمناسبة عيد الشكر وهو عيد قومي امريكي يقام في رابع خميس (قبل اخر سبت) من شهر تشرين الثاني كل عام احياءا لمناسبة كلش مهمة بنظر خوالنا الامريكان وهي انو بعض المكاريد من الهنود الحمر السكان الاصليين لامريكا قاموا بتقديم الطعام للمهاجرين الاوربيين الذين قدموا نظرا لانهم كانوا ميتيين من الجوع بنص البرد والثلج والرياح والمطر. وهالشغلة كبرت بعين خوالنا لان جانوا يمرون بحروب طاحنة خلال هالفترة ويه الهنود.. يعني صايرة مذابح بيناتهم والدم للركب. بس هذوله الهنود طلعوا اخوة هدله وزقنبوهم بدون ميكتلوهم. وفي حديث اخر انو همه الي علموهم الصيد والزراعة حتى يعيشون وكاموا الانكليز من ذاك الوكت يحتفلون بالحصاد بأن يقدمون الشكر لله على هالنعمة
يقال انو وراها رجعت الوضعية انلاصت بس بعدين الامور انحلت ومظل اكو حروب ومجازر
تره مو لان تعبوا الطرفين بس لان مظل اكو اي هندي يحارب. وهسه الهنود بامريكا ينعدون عالاصابع حالهم حال الاقليات بالعراق العظيم
المهم الجهتين اتصالحوا.. او شكم هندي البقى عايش سووا صلح يشبه صلح الحديبية ويه الحنشر الامريكي الجديد وصاروا الامريكان الجدد يذبحون علي-شيش اي الديك الرومي كل عيد احتفالا بهالمناسبة. وبهذه المناسبة العزيزة على قلوب الامريكان انعزمت على علي-شيش ببيت امريكي من اصل عراقي لان هو ديحتفل وحب يعزمني. رحت ولكيت كل المعزومين امريكان بس مو من اهل البيت. يعني لاهمه سكان اصليين هنود حمر ولا همه امريكان بالولادة لكن عرب! وتبادر الى ذهني ليش من قلة الاحتفالات عدنا بالوطن العربي كمنا نحتفل بأعياد امريكية لو لان لازم نتامرك ويه الامريكان؟ كلت ديلا اني شعندي مدوخ روحي… اقلهو حفلة وونسه مو دك ولطم
وراها انعزمت على طلي بمناسبة عيد الاضحى اقيم على شرف الجالية العراقية بالمحافظة الي اني بيها حاليا. والجاليه عين الله عليها. اجدد واحد بيهم مشايف العراق صارله اربع سنين. واعتك واحد مشايفه صارله خمسة وتلاثين سنة. لكن هذا لم يمنع من تبادل الاحاديث التعبانة نفسها انطلاقا من مقولة (العراق ميصير براسه خير) مرورا بالقول المأثور (هيه خربانة من اولها) وصولوا الى (راح نبقى بسوالف السيد ومولاي وهالطيحان حظ!) ومايتخلل هالجمل من مواضيع استباقية ولاحقة نكررها كببغاوات بدون تفكير بس رغبة بالحجي
كانت مناسبة عيد الاضحى ليس للاحتفال بعيد الاضحى فقط ولكن لمحاولة لم شمل العراقيين المتهجولين في هذه المحافظة ضمن كروب او جالية لاحياء التراث المندثر الي عفناه بالعراق العظيم واجينا وكذلك لمساعدة العراقيين الجدد على تلمس طريقهم بمكان ميطبشون لوحدهم ويوكعون بيد الكلاوجية من الامريكان وغيرهم
العراقيين الي هنانه ديحاولون يتأمركون على طريقتهم الخاصة وطبعا ديبدعون بهالمجال. لكن الوقت لايسعفني الان حتى احجيلكم على ابداعاتهم بس هالموضوع طلع براسي فكرة بأن نسوي عيد شكر عراقي-امريكي على طريقة عمو سام ونسوي مثل مسووا الهنود. يعني نصير خوش اوادم وياهم ونرد افضالهم وجمائلهم علينا وعلى الخلفونا واولها انو طلعونا لامريكا بلد التلاثين مليون عاطل
كلت ويه روحي: ليش منسوي عيد بهالمناسبة؟ وبمكان منذبح طلي لان فلوسه كومة واحنا نذبحه بالاضحى او علي-شيش لان يطول بالطبخ وياخذ غاز هوايه وهمه يذبحوه بعيد الشكر خلي نذبحلهم نعامة.! مع انو هي غير متوفرة بالاسواق المحلية والعالمية ويمكن بدت تنقرض بس ميغلى عليهم شي
والمناسبة انو احنا العراقيين ابناء سبعتالاف سنة حضارة دنشكر الامريكان على كل شي سووا النا. وعلى كل شي رادوا يسووا ومكدروا. وعلى كل شي اخذوا فلوسه ومصارلهم مجال يبدون بيه. وعلى كل شي فكروا بيه وتعاجزوا يسووه (مثل جائزة نوبل للخوش نيه الي انطوها لاوبما) لان الرجال على نيتة اجا ديحاول يتفاهم ويه العرب والمسلين. خلف الله عليه شكد خوش ادمي
وهذا العيد نسميه عيد (الخوش نيه) ونذبح بيه نعامة ونذكر بيه الاعمال البطولية الي قام بيها الامريكان بالفلوجة وابو غريب والمطار والوزارات والخدمات وكل هالمكانات الي رادوا يسووها زينة وحلوة ومرهمت
اتصور هيجي مراح يبقى علينا عتب لان صدك راح انصير اولاد حاتم الطائي ونتبرمك براسهم. ونخلي هذا العيد هاليوم بمكان يوم الشهيد الي جان النظام السابق خابصنا بيه علساس ديدافع عن العراق البوابة الشرقية للوطن العربي بوجه المد الفارسي الصفوي.
المهم يوم واحد كانون الاول نسويه (عيد الخوش نيه) لخاوالنا الامريكان وطبعا انطلعهم طبل ومزيقة وناس تردح بالشارع ونخلي العيد على مدى خمسطعش يوم بلياليها. ونوكف الاشغال والاعمال ونعلك الزينة ونشغل المولادت اذا ماكو كهرباء للزينة مال العيد
وكل سنة نجيب الرئيس الامريكي من البيت الابيض ونخلي الحكومة والشعب يشكروا على منيته ومنية الامريكان بنعمة تخليصنا من الاحتلال الصدامي! والله يديم ظله وظل كل من والاه ونصره وكان على دينه او دين جده من جهة ابوه وفك ازمته الاقتصادية واطال ولايته لفترة ثانية وعجل دحر اعدائه واعداء الامة وسهل مخرجه بلا حذاء بالكصة
علاء انيس
Date: January 29, 2010
