في صبيحة يوم الخامس والعشرين من تشرن الاول تصادف الذكرى السنوية لتخليد ذكرى المغفور له السيد ميخائيل جاسم المتربع على عرش البوب والهوب والفيدرالية

ومن منطلق (خلي بورتلاند خربانة) يقوم البورتلنديون الشرفاء في مثل هذا اليوم من كل عام (وهالسنة همينه) بأحياء ذكرى (مشاية الزومبي) الى ساحة البايونيير في (جوا البلد) او كما يطلق عليها العراقييون (الساحة الحمراء) لاحمرار طابوكها

وكما متعارف عندهم تبدأ المشاية بالمشي من بيوتهم ويلتقون عند الساحة ليقوموا بأداء الرقصة الشهيرة مال السيد الطيب الذكر ميخائيل جاسم على انغام اغنيته الشهيرة (بس اضربها.. اضربها) وبعدين يطكون شكم صورة ويخلون الناس اطكلهم جم صورة الخ ويرجعون لبيوتهم وهم يبتسمون فرحين ومنشكحين الى حد الثمالة

اثناء حضوري هذا التجمهر الغريب لهولاء البورتلنديون. استرعى انتباهي (انتبهوا عالمصطلحات الي ده استعملها) استرعى انتباهي موضوع تشابه وتناسخ وربما اقتباس العديد من التقاليد والممارسات والطقوس بين شعوب العالم المتحضر والمتخلف والمفلكح والمنغلق وحتى الطايح حظه

فمثلا اذا جئنا بمقاربة اثنية عقائدية جمعية بين اهل بغداد واهل اوريغون نرصد من الوهلة الاولى بعض او العديد من التشابهات التي تصل الي حد التسؤال ان كان هؤلاء الشعبين قد اتفقا سرا على القيام بنفس الممارسات وفي نفس التاريخ

فمثلا في اوريغون يقوم الناس بتقليد الموتى من حيث طريقة الموت وربما بشاعتها مرورا بالعديد من التشابيه المريضة لاموات نتيجة حوادث او انفجارات او مذبوحين على الطريقة السلفية او طلقة بالراس كما شاهدت احداهن (وكانت خوش حاته والله يستر عرضها) حيث قد وضعت طلقة في وسط رأسها وكأنها ناتجة عن غسل عار كما يبين ملبسها

اما بالعراق فلا يحتاج الامر الى تمثيل لانه حصل بانفجارين يوم الاحد الدامي. والي طلع منه تلكوه مبتسم وديضحك لان طلع سلامات وهو يسترجع مع نفسه تفاصيل الانفجار حتى يعرف شلون يخرطه لاهله واصدقائه من يضحكون بوجهه وهمه يحمدو عالسلامة

وعلى ذكر الاحد الدامي فأرجو من الحكومة والمسؤولين ووسائل الاعلام المرئية والمسموعة والمقروئة بعدم تكرار الاسماء حتى منخربط بين الاربعاء والاحد. ولو الايام كلها صايرة نفس الشي واحد مثل اللاخ ولا فرق بين يوم ويوم الا بعدد الضحايا

نرجع لموضوعنا: مو بس اكو تشابه بس اكو اختلافات همينه. مثلا: ببروتلاند من يجتمعون المشاية يبدون احتفالهم بأن يكونون متمددين بالكاع ويكومون وكأنهم اموات من القبور قد قامت في يوم الحشر ومن ثم تبدأ الموسيقى بالعزف ويبدي الدك واللطم. قصدي البريك دانس

اما في العراق فالامور معكوسة: يبدي اول مرة البريك دانس. قصدي الدك واللطم من ميكون عدنا شغل ووراها العالم تكوم تتجطل بالكاع من تخلص الاغنية. ولو بالعراق منركص على اغنية وحدة بس نعرف انو الاغنية خلصت ويه اول انفجار يصير. وتلكه الكل مجطلين

العراقيين غير منظمين مثل البورتلنديين باللطم لسبب انو احنا (كلمن يلطم على سليقته) وبالطريقة التي يشتهيها قلبه

ماكو حاجة نصير كلنا نركص سوى مثل مايكل جاكسن. كل واحد يركص مثل ميريد. الحمدلله البلد بخير وكلها شايلة ايبود وتسمع اغاني. من حسام الرسام الى فيفتي سنت الى باسم الكربلائي. تره النظام ابد محلو. كلها تمشي سوى وتتحرك سوى. غير كل واحد يسوي الي يعجبه؟ هو احنا مرة وحدة جايين لهالدنيا نموت… غير نموت بمزاجنا؟ طبعا البورتلنديين وبقية العالم يكولون: احنا جايين لهالدنيا مرة وحدة نعيش!! ولو ماكو فرق هوايه بين الفكرتين لان ثنتينهم يصيرون مرة وحدة فقط لاغير

من سخرية القدر انو اجا ببالي لو واحد عراقي مهزوم (اكيد مهزوم من دول الجوار) جاي لبروتلاند ذاك اليوم وشاف كل هالعالم مجطلة بالشارع. يمكن جان راح يتلفت يمينا وشمالا ليسأل اول شخص يصادفه ان كانت هذه بغداد ام لا. بس كلت ويه روحي (اكيد مراح يسأل) لان مبين مطافية الكهرباء. ولو على مسمعت انو الكهرباء (مرااااات) تجي والعراق (رااااح) يتعمر

مادري ليش مدوخ روحي ومدوخكم بهالسوالف. اني جان لازم اطلع الطم ويه الربع ذاك اليوم احسن مما اظل واكف فاتح حلكي ومبين من بعد سنة عراقي مشايف

خابصكم وخابص روحي بالاحد الدامي والماي الخابط والوضع الخربان والسوالف التعبانة. خوب اسولفلكم عالناس شلون عايشة احسن. الا اني بطران. يعني ميكفي جارعيني ودتقرولي هالمرة اذكركم بالي ديصير!! تره هاي متطلع

قابل شنو الجديد وده احجي عليه؟ هي شكم مليار طارت ويه الجعفري وهسه رجعت طارت ويه المالكي

على شكم مليون عراقي مادري وينهم ولا اكو داعي ادور عليهم اصلا

على شكم مشروع نجحت واستلموا فلوسها وفادت البلد بس عالورق

على شكم فكرة طايح حظها ممكن تفيدنا بس مو مال نحجيها لان راح تطيح حظ الحكومة

على شكم نكتة براسي وشكم مسبة تلحكها وشكم قندرة اريد اشمرها بس اخاف حالي حال منتظر

ولو كل الشعب هسه صاير منتظر.. بس منتظر رحمة الله

والله الظاهر خلكه كلش طويل

تصبحون على خير

معاني الكلمات للي مفتهمني

Michael Jackson :ميخائيل جاسم

Keep Portland Weird :خلي بورتلاند خربانة

Zombie Walk :مشاية الزومبي

Just beat it.. beat it :بس اضربها.. اضربها

Down Town :جوا البلد

الثمالة: السكر والعياذ بالله

استرعى: صاحه بسرعة

المتحضر: الدول المتقدمة

المتخلف: العالم الثالث

الطايح حظه: العراق

سليقة: يمكن نوع من الخضروات

علاء انيس

MADE IN IRAQ

http://iraqbook.blogspot.com